मनहरी–असोज ३ गते । ‘भोला गुरु’ का नामले चिनिनु भएका मनहरी गाउँपालिका ७ निबासी ज्योतिष पण्डित भोला प्रसाद पौडेलको निधन भएको छ ।
एक बर्षदेखि फोक्सोको क्यान्सरको पीडा सहँदै आउनु भएका उहाँको असोज ३ गते बिहान ७ बजे मनहरीबजारस्थित आफ्नै निवासमा ६७ बर्षको उमेरमा उहाँको देहान्त भएको हो ।
कैलाश गाउँपालिका वडा नं ४ पुख्र्याैंली घर भएका पौडेल पश्चिम मकवानपुरकै चर्चित ज्योतिष र पण्डित हुनुहुथ्यो । कैलाश, राक्सिराङ र मनहरी गाउँपालिका क्षेत्रको धार्मिक अनुष्ठानहरुमा उहाँले नेतृत्वदायी भूमिका खेल्दै आइरहनु भएको थियो । नियमित धार्मिक कार्यसहित श्रीमद् भागवत कथा प्रवचनमा उहाँ निपुण हुनुहुन्थ्यो ।
नेपालमा बहुदलीय प्रजातन्त्र प्राप्तिपछि हालको राक्सिराङ गाउँपालिका वडा नं ३ सरिखेतपलाँसे बसाइँ सर्नु भएका पौडेल २०६० सालदेखि निरन्तर मनहरीमा बसाइँ सरी बसोबास गर्दै हुनुहुन्थ्यो ।
बसाई सरेर आएपनि आफ्नो पुख्र्याैली थातथलोमा निरन्तर सेवा गरिरहनु भएका उहाँलाई एक बर्षअघि छाती दुख्ने समस्या भएपछि उपचार गर्न जाँदा क्यान्सर भएको पत्ता लागेको थियो । उहाँ व्यंग्यकार एबम् मनहरी ७ स्थित राष्ट्रिय रोटरी माविका प्रधानाध्यापक गोविन्दप्रसाद पौडेलको पिता हुनुहुन्छ ।
