Wednesday, May 22, 2024

राक्सिराङलाई सीता अशोकको ‘सिड सेन्टर’ बनाउने अभियान

ताजा / भरखरै प्राप्त

राक्सिराङ–भदौ ३० गते । राक्सिराङ गाउँपालिका ३ लाई सीता अशोकको बीऊ केन्द्र बनाउने गरी धमाधम बृक्षरोपण गरिएको छ ।

डिभिजन वन कार्यालय राप्ती मनहरीको नर्सरीमा यसबर्षबाट पहिलोपटक उत्पादन गरिएको सीता अशोकको बिरुवा राक्सिराङ गाउँपालिका वडा नं ३ का विभिन्न धार्मिक, पर्यटकीय र सार्बजनिक जग्गाहरुमा रोप्न थालिएको हो ।

शनिबार बिहान मात्रै पनि राक्सिराङ गाउँपालिका वडा नं ३ जलपरी झरनास्थित खाली भुभागहरुमा सीता अशोकको बिरुवा रोपिएको छ ।

स्थानीय सिद्धार्थ हरियाली सामुदायिक वन उपभोक्ता समूहको अगुवाईमा डिभिजन वन कार्यालय राप्ती मनहरीसँगको समन्वयमा झरना परिसरमा ३ सय बिरुवा रोप्ने उद्देश्यसहित बृक्षरोपण थालिएको सामुदायिक वनका अध्यक्ष ज्ञानेन्द्र तामाङले बताउनुभयो ।

उहाँका अनुसार स्थान हेरेर जलपरी झरना परिसर, सिमपानी देवकोट सरिखेत मोटरबाटोका किनारातर्फ बिरुवा रोप्ने कार्यलाई निरन्तरता दिइनेछ ।

जलपरी झरना जाने गेट छेउमै बृक्षरोपण गर्दै डिभिजन वन कार्यालय राप्ती मनहरीका प्रमुख बिष्णुप्रसाद आचार्य र सिद्धार्थ हरियाली सामुदायिक वन उपभोक्ता समूहका अध्यक्ष ज्ञानेन्द्र तामाङ ।

उता राक्सिराङ ३ कै भ¥याङकाली सामुदायिक वन उपभोक्ता समूहको अगुवाई सीता अशोक बाटिका छेउदेखि सूर्याेदय माविको तल्लो भवन परिसरसम्म सीता अशोकको बिरुवा रोपिएका छन् । सीता अशोक बाटिकादेखि विद्यालय परिसरसम्मको सार्बजनिक नहरको छेउमा सीता अशोकको बिरुवा रोपिएको वन समूहका अध्यक्ष केशव भारतीले बताउनुभयो ।

सीता अशोक बाटिकामा यसअघि करिब एक सयबर्ष पुरानो ठानिएको सीता अशोकका तीनदर्जन बढी पुराना रुखहरु रहेका छन् । अशोकघारी नामले परिचित उक्त स्थानमा भगवान सीता र उनको रेखदेख गरेकी त्रिजटा (राक्षसपक्ष) को प्रतिमा समेत स्थापना गरिसकिएको छ ।

‘हामीले राक्सिराङ ३ लाई सिड सेन्टरको रुपमा विकास गर्न खोजिरहेका छौँ’, डिभिजन वन कार्यालय राप्ती मनहरीका प्रमुख बिष्णुप्रसाद आचार्यले भन्नुभयो–‘जलपरी झरना, सीता अशोक बाटिका, स्थानीय गुम्बा, चौतारी र सार्बजनिक जग्गाहरुमा सीता अशोकको बिरुवा रोप्नका लागि पहल र सहजीकरण गरिरहेका छौँ ।’

सीता अशोकको बिरुवा नहुने भूगोलहरुमा भने छतिवन, दार, चिउरी लगायतका बिरुवा रोप्न प्रेरित गरिएको उहाँले बताउनुभयो ।

जलपरी झरना उक्लने बाटो परिसरमा बृक्षरोपण गर्दै स्थानीय उपभोक्ताहरु ।

सीता अशोक बाटिका अगाडिको तटबन्धनलाई लक्षित गरी चुर्लिङ बगर क्षेत्रमा २ सय ५० भन्दा बढी छतिवनको बिरुवा रोप्ने गरी भ¥याङकाली सामुदायिक वन उपभोक्तासँग समन्वय भइरहेको उहाँले बताउनुभयो ।

‘धार्मिक हिसावले, आयुर्वेदिक हिसावले पनि हामीले सीता अशोकको हब राक्सिराङ ३ लाई बनाउन खोजेका छौँ’, आचार्यको भनाई छ–‘हामी सीता अशोकको बीऊमा निर्भर हुने र भारतीय धार्मिक पर्यटकलाई यहाँ भित्र्याउन चाहेका छौँ ।’ ७–८ बर्षभित्रमा आफ्नो लक्ष्य सफल हुने पनि आचार्यले विश्वास ब्यक्त गर्नुभयो ।

लोकप्रिय

Related Articles