Thursday, April 18, 2024

राक्सिराङका सामुदायिक वनहरुलाई सक्रिय बनाउन छलफल

ताजा / भरखरै प्राप्त

मनहरी । राक्सिराङ गाउँपालिका भित्र रहेका विभिन्न सामुदायिक वन उपभोक्ता समुहहरुलाई सक्रिय र चलायमान बनाउनका लागि छलफल गरिएको छ ।

सामुदायिक वन उपभोक्ता महासंघ राक्सिराङ गाउँपालिकाको अगुवाईमा विभिन्न सामुदायिक वन उपभोक्ता समुहका पदाधिकारी, सब डिभिजन वन कार्यालय राक्सिराङ र डिभिजन वन कार्यालय राप्तीका कर्मचारीहरुबीच छलफल गरिएको हो ।

छलफलमा विभिन्न सामुदायिक वनका पदाधिकारीहरुले वनमा रहेका समस्या, चुनौती र असहजताका बारेमा गुनासो राखेका थिए ।

सामुदायिक वनहरुमा जाने डढेलो, वन क्षेत्रमा जथाभावी हुने सडक निर्माण तथा उपभोक्तामा जनचेतनाको कमीलगायत चुनौती रहेको उनीहरुको भनाई छ । राक्सिराङ सब डिभिजनका प्रमुख दिनेश सत्यालले निष्क्रिय रहेका र अव्यवस्थित समुहहरुलाई सक्रिय बनाई वन संरक्षण र उपभोक्ताको हितमा काम गराउन पहल गरिएको बताउनुभयो ।

राक्सिराङका ३५ वटा सामुदायिक वनमध्य केही समुह मात्र क्रियाशील रहेको बताउँदै उहाँले उपभोक्ता समुह र वन क्षेत्रको समुदाय नै जागरुक हुनुपर्ने बताउनुभयो । राप्ती डिभिजनका डिभिजनल वन अधिकृत बिष्णु प्रसाद आचार्यले राक्सिराङका वन क्षेत्र पर्यापर्यटन र जिविकोपार्जनका हिसाबले महत्वपुर्ण रहेको औल्याउनुभयो ।

कार्यालयका तर्फबाट विभिन्न लक्षित कार्यक्रम लागु गरि वनको विकास र समुदायको जीवनस्तर सुधारमा काम भईरहेको उहाँको भनाई छ । सालक, चिउरी, छतिवन, दारजस्ता वन पैदावरको संरक्षण र प्रवद्र्धनमा विभिन्न कार्यक्रम गरिएको बताउँदै उहाँले वनको संरक्षण र विकासमा समुदायले अपनत्व लिनुपर्ने बताउनुभयो ।

ठुला योजना सञ्चालनका लागि बजेट अभाव रहेकाले संघ, प्रदेश तथा स्थानीय सरकारसँग आवश्यक पहलसमेत भइरहेको उहाँले बताउनुभयो । सामुदायिक वन उपभोक्ता महासंघ राक्सिराङका अध्यक्ष सन्तोष थापामगरले सामुदायिक वनहरुलाई सक्रिय बनाउन महासंघले अगुवाई गर्ने बताउनुभयो ।

राक्सिराङ गाउँपालिका, वन कार्यालय र उपभोक्ता समुहहरुबीच अन्तरक्रिया गरि आपसी सहकार्य र समन्वयको वातावरण बनाइने उहाँले बताउनुभयो ।

अव्यवस्थित रहेका, नविकरण नभएका, निष्क्रिय रहेका सबै समुहहरुलाई क्रियाशिल बनाउन महासंघले जागरण अभियान थाल्ने योजना रहेको थापाको भनाई छ ।

लोकप्रिय

Related Articles