Thursday, May 30, 2024

विद्यालयमा शिक्षकहरु लुडो खेलेर बसेको पनि भेटियो !

ताजा / भरखरै प्राप्त

हेटौँडा–चैत २१ गते । हेटौँडा १९ नेवारपानीस्थित अरनिको माध्यमिक विद्यालय सुधारका लागि स्थानीय महिलाहरुले आक्रामक रुपमा प्रश्न उठाएका छन् ।

डब्लुपीडी नेपाल र इन्सेकले सञ्चालन गरेको अधिकार तथा आर्थिक विकास मार्फत महिला शस्िरक्तकरण कार्यक्रम अन्तर्गत हेटौँडा १९ बस्तीपुरमा आयोजित अन्तरक्रियामा बोल्दै महिलाहरुले विद्यालयको शैक्षिक अबस्था सुधार नआएकामा चिन्ता ब्यक्त गरेका हुन् ।

अन्तरक्रिया कार्यक्रममा बोल्दै स्थानीय अभिभावक सीता अधिकारीले विद्यालयका शिक्षकहरु कक्षा कोठामा अध्यापन कार्यमा सहभागी नभई विभिन्न काम भन्दै विद्यालय बाहिर बढी रमाउने गरेको आरोप लगाउनु भयो ।

खानेपानी र शौचालय समेत अब्यवस्थित रहेको भन्दै उहाँले पछिल्ला केही बर्षदेखि विद्यालयको अबस्थामा सुधार आउन नसकेको बताउनुभयो ।

त्यसैगरी सिर्जना बिडारीले आफू एक दिन विद्यालय पुग्दा चौरभरि विद्यार्थीहरु दौडिरहेका र शिक्षकहरु अफिसमा लुडो खेलिरहेको समेत भेटेको बताउनुभयो । ‘मैले फोटो खिचौँ भनेर पनि थर्काएँ तर खिचिन’, उहाँले भन्नुभयो–‘हामी ड्युटी गरेर रेष्टमा बसेका छौँ, हाम्रो ड्युटी सकियो’ भनेर जबाफ फर्काए ।

कार्यक्रमभर धेरैजसो अरनिको माध्यमिक विद्यालयकै चर्चा भयो । कतिपयले त शौचालयमा प्रयोग गरेका प्याड समेत विद्यार्थीले नै सफाई गर्नुपरेको गुनासो समेत सुनाउन भ्याए ।

उठेका सबै बिषयहरुको जबाफ दिँदै विद्यालयका प्रधानाध्यापक बिष्णु परियारले बिस्तारै बिस्तारै शैक्षिक सुधार हुँदै गएको बताउनुभयो । उठेका सबै बिषयहरु जायज रहेको भन्दै उहाँले सबै मिलेर सुधार गर्दै जानुपर्ने र पछिल्ला केही बर्षहरुमा तुलनात्मक सुधार आइरहेको बताउनुयभो ।

त्यसैगरी नेवारपानीस्थित सहरी स्वास्थ्य इकाईमा शौचालयको समस्या रहेको, हल व्यवस्थापन हुन नसकेको लगायतका समस्याहरु उठान भएका थिए । इकाइकी स्वास्थ्य निरीक्ष सुसन शर्माले स्वास्थ्य केन्द्र सुधारका लागि वडाले बजेट नछुट्याएकोमा दुखेसो गर्नुभयो ।

कार्यक्रम निर्मल माध्यमिक विद्यालयका प्रधानाध्यापक प्रवोध बिडारी, वडा सदस्य राजकुमार बजु, वडा कार्यालयका दीपकप्रसाद रिजाल लगायतले उठेका सबालहरुको जबाफ दिनु भएको थियो ।

इन्सेक नेपालका कार्यक्रम संयोजक कृष्ण प्रसाद नेपाल, डब्लुपीडीका फिल्ड सुपरभाइजर तिलकुमारी हुमागाई लगायतको सहभागिता थियो ।

लोकप्रिय

Related Articles