Thursday, April 18, 2024

सामुदायिक वनमा डढेलो लगाउनेलाई ९० हजार जरिबाना

ताजा / भरखरै प्राप्त

हेटौँडा–फागुन २४ गते । सामुदायिक वन उपभोक्ता समूहको वन पैदावारको क्षति हुनेगरी डढेलो लगाएर भागेका तीन जनालाई नियन्त्रणमा लिई जरिबाना तिराइएको छ ।

हेटौँडा १९ नेवारपानीस्थित कालिका हरियाली सामुदायिक वन उपभोक्ता समूहको क्षेत्रमा डढेलो लगाउने तीन जनालाई नियन्त्रणमा लिई जरिबाना तिराइएको वन समूहले जनाएको छ ।

वन समूहका अध्यक्ष गान्धी लामाका अनुसार मनहरी गाउँपालिका वडा नं ४ बाट आएका युवाहरु गौरव गौतम, हस्तबहादुर अर्याल र रोनिश कार्कीले वन क्षेत्रमा डढेलो लगाएरका भागेको पाइएपछि डिभिजन वन कार्यालय राप्ती मनहरी र इलाका प्रहरी कार्यालय नेवारपानीको समन्वयमा उनीहरुलाई वन समूहको कार्यालयमा झिकाई ९० हजार जरिबाना तिराइएको हो ।

वनमा पुगेको क्षतिको मूल्यांकन गरी जरिबाना तिराएर मनहरी गाउँपालिका ४ नं वडाध्यक्ष प्रकाश थापाको जमानीमा उनीहरुलाई छाडिएको वन समूहले जनाएको छ ।

ती युवाहरुले मंगलबार नेवारपानीस्थित बृक्षरोपण भएको क्षेत्रमा डढेलो लगाएर भागेको र स्थानीय उपभोक्ताहरुले उनीहरुको हुलिया पहिचान गरेकाले झिकाउन सजिलो भएको हो । उनीहरुले लगाएको डढेलो बढ्दै जाँदा हेटौँडा उपमहानगरपालिकाको दमकल प्रयोग गरी नियन्त्रणमा लिनुपरेको थियो ।

वनमा आगजनी गर्ने र डढेलो लगाउनेहरुलाई यसपटक सख्त कारबाही गर्ने र डढेलो नियन्त्रणमा जनसहभागिताको विकास गर्ने नीति डिभिजन वन कार्यालय राप्ती मनहरीले अख्तियार गरेको जनाएको छ ।

लोकप्रिय

Related Articles