मनहरी–फागुन २४ गते । अधिकाँश रोगब्याधीका कारण मानिसले दैनिक सेवन गर्ने खानेकुराबाट हुने गर्दछ ।
जब खानपानमा ध्यान पुग्दैन, तब शरीरमा विभिन्न किसिमका संक्रमणहरु सुरु हुने गर्दछन् र शरीरमा रोग बढ्दै जान्छ ।
नेपालका परम्परागत खानेकुरा, खानेकुरा पकाउने भाँडाकुडाहरु के कति वैज्ञानिक थिए भन्ने कुरा नबुझीकन नेपालीहरुले भान्साको स्वरुप, पाक्ने चीजबस्तुहरु, भाँडाकुँडाहरु र खाना खाँदाको आसनलाई समेत आधुनिकीकरणको नाउँमा फेरिररहेका छन् ।
जसका कारण भान्साघरबाटै रोगको उत्पादन भइरहेको विद्यमान अबस्था छ ।
यसै कुरालाई मध्यनजर गरी मनहरी गाउँपालिका ८ स्थित आमाघर सेवा आश्रममा भान्सा सुधार सम्बन्धी कार्यशाला भोलि फागुन २५ गते बिहीवार हुँदैछ । भान्छा सुधार अभियान नेपालसँगको सहकार्यमा अनुभवी चिकित्सकहरुको समेत सहभागितामा कार्यशाला हुन लागेको हो ।
कार्यशालामा कुन भाँडामा कस्तो खानेकुरा पकाउन मिल्ने ? कुन कुन खानेकुरा कसरी पकाउने ? कसरी पकाउँदा स्वस्थ हुने र कसरी पकाउँदा रोग निम्तिने ? जस्ता बिषयहरुबारे विज्ञहरुले स्पष्ट पार्ने कार्यक्रम रहेको आश्रमका अध्यक्ष रामचन्द्र उप्रेतीले बताउनुभयो ।
‘हामीले यो कार्यक्रम निःशुल्क आयोजना गरेका हौँ, बिहान ११ बजे भान्सामा खटिनुहुने जोकोही गृहिणीहरु कार्यक्रममा सहभागी हुन पाउनेछन्’, अध्यक्ष उप्रेतीको भनाई छ–‘मनहरी र आसपासका क्षेत्रका भान्सामा ब्यस्त हुने महिला दिदीवहिनीहरुलाई हामी भान्सा ब्यवस्थापनका बारेमा जानकार बनाउँछौँ ।’
सम्पूर्ण आमा, दिदी बहिनीहरुलाई भान्साबाट उत्पन्न रोगबारे अग्रिम जानकारी गराई ती रोगको निदानका लागि भान्साघरलाई औषधालयकै रुपमा उपयोग गर्न सक्ने सीप विकास गराउनका लागि कार्यक्रम आयोजना गरिएको आमाघर आश्रमका संरक्षण बिजयराज सिग्देलले बताउनुभयो ।
