हेटौँडा–फागुन २० गते । नेकपा एकीकृत समाजवादी मकवानपुरका अध्यक्ष बिष्णुप्रसाद दाहालले आफ्नो पार्टीका नेताहरुका बारेमा मकवानपुरमा नराम्रो हल्ला भइरहेको आरोप लगाउनु भएको छ ।
उहाँले मनहरी लाइभ डटकमसँग कुराकानी गर्दै भन्नुभयो–‘हाम्रो पार्टीका उपाध्यक्ष केदार न्यौपाने र स्थायी कमिटी सदस्य ललित बस्नेत पनि एमालेमा समाहित हुने भनेर हल्ला फिँजाइएको छ, यो नितान्त भ्रामक कुरा हुन् ।’
दुई दिनअघि एमालेका जिल्ला सचिव नविन सिग्देल र सह सचिव हिदम लामा हेटौँडा ४ स्थित स्थायी कमिटी सदस्य बस्नेतको घरमा स्ववियु निर्वाचन लगायतका बिषयमा छलफल गर्न पुग्नु भएको कुरामा सत्यता रहेको अध्यक्ष दाहालको भनाई छ ।
‘हामी गठबन्धनका ८ दलका विद्यार्थी संगठनहरु एकातिर छौं, एमाले अर्काेतिर छ’, अध्यक्ष दाहालको भनाई छ–‘८ दलका ८ संगठनलाई फुटाएर समाजवादी र एमाले मिलाउन पाए पनि ठूलै उपलब्धी हुने थियो भन्दै उहाँहरु हाम्रा नेताका घर धाउनु भएको हो ।’ तर, सामाजिक सञ्जालतिर न्यौपाने र बस्नेत पनि एमालेतिर जाँदैछन् भन्ने हल्ला चलाइएको र एमाले आत्मरतिमा रमाइरहेको टिप्पणी दाहालले गर्नुभयो ।
दाहालले मकवानपुरका ८ वटै क्याम्पसमा नेकपा एकीकृत समाजवादीको विद्यार्थी संगठन अनेरास्ववियूले समूह दर्ता गरेको र ८ दलनिकट विद्यार्थी संगठनको मर्म र भावना बमोजिम नै चुनावी प्रक्रिया अघि बढ्ने बताउनुभयो ।
‘केन्द्रमा केपी ओलीले जे जसरी माधव नेपालसँग भेटेर हौवा फिजाइरहेका छन्, जिल्लामा पनि त्यस्तै भएको मात्रै हो’, उहाँले भन्नुभयो । एमालेका नेताहरुसँगको भेटबारे नेता न्यौपाने र बस्नेतले समेत नियमित र सामान्य राजनीतिक भेटघाट भनी प्रतिक्रिया दिनु भएको छ ।
‘पार्टी प्रवेश, एकता वा समायोजन लगायतका बिषयहरु थिए भने एमालेका जिल्ला कमिटीका तेस्रो र चौथो बरियताका नेताहरुसँग कुरा गर्नुपर्ने अबस्था छैन, केन्द्रमै वा बालकोटमै पहुँच राख्ने नेताहरुमा न्यौपाने र बस्नेत पर्नुहुन्छ’, समाजवादीका एक जिल्ला कमिटी सदस्यले भन्नुभयो–‘राजनीतिक भेटघाट, बाम एकता अभ्यास लगायतका छलफलका बिषयहरुमा छलफल भएको हो ।’
