Thursday, May 30, 2024

मनहरीमा बाल अधिकार समिति बैठकः बालगृहको तथ्याङ्क संकलन हुने

ताजा / भरखरै प्राप्त

मनहरी–फागुन २१ गते । असहाय तथा अनाथ बालबालिकालाई संरक्षणको नाउँमा विभिन्न व्यक्ति वा संस्थाहरुले घरेलु रुपमा सञ्चालन गर्दै आइरहेको बालगृह वा छात्राबासहरुका बारेमा मनहरी गाउँपालिकाले चासो ब्यक्त गरेको छ ।

गाउँपालिकास्तरीय बाल अधिकार समितिको बैठकले ९ वटै वडामा सञ्चालित त्यस्ता बाल गृह वा छात्रबासहरुको बैधानिकताबारे तथ्याङ्क संकलन गर्न लागेको हो ।

समितिका संयोजक समेत रहनु भएकी मनहरी गाउँपालिका उपाध्यक्ष सीता पुलामी मगर (रेखा) ले त्यसरी सञ्चालनमा रहेका बालगृह वा छात्रबासहरुले अनुमति लिएका छन् कि छैनन् ? बालमैत्री वातावरण छ कि छैन ? नियमानुसार सञ्चालन भएको छ कि छैन ? भनेर पालिकाको तर्फबाट अनुगमन हुने बताउनुभयो ।

त्यस्ता बालगृहहरु के कति मात्रामा सञ्चालित छन् भनेर हरेक वडा कार्यालयमार्फत बिवरण संकलन गर्ने र सोको अनुगमन गरी बैधानिक ढंगले सञ्चालनका लागि पहल गर्ने उहाँले बताउनुभयो ।
‘हामीले बालबालिका क्षेत्रको कामलाई अब अझ धेरै प्राथमिकता दिएर गर्नुपर्नेछ’, उपाध्यक्ष मगरले भन्नुभयो–‘बालमैत्री गाउँपालिका भएकाले यसअघि भएका र गरिएका कामहरुलाई पुरानै रफ्तारमा लैजानुपर्नेछ ।’

उपाध्यक्ष मगरले अब छिट्टै बालमैत्री सहजकर्ताहरुको नियुक्ति हुने र त्यसपछि अझ कामले रफ्तार लिने समेत बताउनुभयो ।

बैठकमा सिविन बाल हेल्पलाइनका कार्यक्रम संयोजक झविन्द्र ज्ञवालीले मनहरी गाउँपालिकामा यसअघि बनेका बाल संरक्षण नीति, बालश्रम निबारण सम्बन्धी कार्ययोजना, बाल संरक्षण, अनुगमन, उद्धार, आपतकालीन सहयोग तथा पुनस्र्थापना कार्यविधि लगायतका बारेमा स्पष्ट पार्नु भएको थियो ।

बैठकमा बाल अधिकार समितिमा प्रतिनिधित्व गर्ने नागरिक समाज, प्रहरी, पत्रकार, गैरसरकारी संस्थाहरुको उपस्थिति रहेको थियो ।

लोकप्रिय

Related Articles