मनहरी–फागुन ६ गते । मनहरी गाउँपालिकाका ११ वटा विद्यालय सुधारका लागि ६० लाख रुपियाँ पाउने भएका छन् ।
चालू आर्थिक बर्ष २०७९/८०को स्वीकृत कार्यक्रम अनुसार भौतिक सुधार, खानेपानी, विद्यालय घेराबार लगायतका शीर्षकहरुमा ११ वटा विद्यालयका लागि ६० लाख रुपियाँ बितरण गर्न लागिएको हो ।
गाउँ कार्यपालिकाको गत माघ २६ गते बसेको बैठकले ११ वटा विद्यालयको छनौट गरेको गाउँपालिका अध्यक्ष रन्जन कालाखेतीले बताउनुभयो ।
उहाँका अनुसार खानेपानी, भौतिक सुधार, बाल विकास केन्द्र मर्मत लगायत शीर्षकमा रकम प्राप्त गर्ने विद्यालयहरुमा युवा बर्ष गंगा आधारभूत विद्यालय मनहरी ९ ले ३ लाख, सगरमाथा आधारभूत विद्यालय मनहरी ६ ले ५ लाख, सृजना प्रावि मनहरी ४ ले ८ लाख, भोजसिद्ध मावि मनहरी ५ ले ३ लाख, महेन्द्रज्योति मावि मनहरी ३ ले १३ लाख र प्रगति राष्ट्रिय प्रावि मनहरी ६ ले ५ लाख प्राप्त गर्नेछन् ।
त्यसैगरी सहिद स्मृति बाल कल्याण प्रावि मनहरी ९ ले ५ लाख, सीता मावि मनहरी २ ले ६ लाख, जनज्योति आधारभूत विद्यालय मनहरी १ ले ४ लाख, राष्ट्रिय आधारभूत विद्यालय मनहरी ७ ले ६ लाख र महेन्द्रकिरण माध्यमिक विद्यालय मनहरी ८ ले २ लाख रुपियाँ प्राप्त गर्नेछन् ।
कार्यपालिका बैठकबाट ती विद्यालयहरुलाई बजेट बिनियोजन गरिएकामा प्रक्रिया पु¥याएर विद्यालयहरुमा कामको लगत इष्टमेट र कार्य सम्पादन मूल्यांकनका आधारमा भुक्तानी दिने गरी सम्झौता हुने गाउँपालिकाले जनाएको छ ।
