Thursday, April 18, 2024

मनहरीमा ५ पछि वडा नं १ ले पनि कार्यालयबाटै बाँड्यो सामाजिक सुरक्षा भत्ता

ताजा / भरखरै प्राप्त

मनहरी–माघ २९ गते । मनहरी गाउँपालिकाको वडा नं १ ले पनि कार्यालयबाटै सामाजिक सुरक्षा भत्ता बितरण गरेको छ ।

यसअघि वडा नं ५ ले आफ्नै कार्यालयमा बैँकलाई बोलाएर लाभग्राहीसामु भत्ता बितरणको व्यवस्था मिलाउँदै आएको छ ।

मनहरी ७ मा शाखा कार्यालय रहेको मुक्तिनाथ विकास बैँक परिबर्तन गरी हेटौँडास्थित कामना सेवा बैँकमार्फत सामाजिक सुरक्षा भत्ता बितरणको व्यवस्था मिलाइएको १ नं वडाध्यक्ष शिवप्रसाद खनालले बताउनुभयो । ‘यतै पायक पर्ने र बैँकले पनि वडा कार्यालयमै आएर भत्ता बाँडिदिन राजी भएपछि खाताहरु कामना सेवा विकास बैँकमै खोलेर कारोबार गरेका हौँ’, वडाध्यक्ष खनालले भन्नुभयो ।

उहाँका अनुसार बैँकले वडा कार्यालयमै आएर सामाजिक सुरक्षा भत्ता बितरण गरेपछि लाभग्राही बृद्धबृद्धा, अपांगता भएका व्यक्ति र विधुवाहरु खुसी भएका छन् । बैँकलाई कार्यालयसम्म ल्याएर रकम बाँड्नका लागि आवश्यक पर्ने सुरक्षा र अन्य व्यवस्थापकीय पक्षको जिम्मेवारी वडा कार्यालयले नै लिएको उहाँले बताउनुभयो ।

दोस्रो त्रैमासिक सामाजिक सुरक्षा भत्ता बितरणमा वडा नं ५ ले पनि कार्यालयबाट यथावत रुपमै बितरण गरेको छ ।

गाउँपालिकामै पहिलोपटक आफ्नै कार्यालयबाट सामाजिक सुरक्षा भत्ता बितरण सुरुवात गरेको ५ नं वडा कार्यालयले यसपटक कार्यालयमा उपस्थित हुन नसक्ने अपाङ्गता भएका र बढी उमेरका ज्येष्ठ नागरिकलाई घरमै पुगेर भत्ता बितरण गरिदिएको वडाध्यक्ष दीपेन्द्र अधिकारीले बताउनुभयो ।

५ नं वडामा सांग्रिला विकास बैँकले सामाजिक सुरक्षा भत्ताबापतको रकम लाभग्राहीलाई बितरण गर्ने जिम्मा पाएको छ ।
मनहरी गाउँपालिकामा ३ हजार ७ सय १२ जनाले दोस्रो त्रैमासिक अबधिको सामाजिक सुरक्षा भत्ता पाएका छन् ।

संघीय सरकारबाट ज्येष्ठ नागरिक, दलित ज्येष्ठ नागरिक, विधुवा ज्येष्ठ नागरिक, एकल महिला, दलित बालबालिका, अपांगता भएका ब्यक्ति र सीमान्तकृत बालबालिकालाई सामाजिक सुरक्षा भत्ताका लागि रकम पालिकामा आउने गर्दछ ।

त्रैमासिक अबधिका लागि ३ करोड ७० लाख ५४ हजार ८४५ रुपियाँ सामाजिक सुरक्षा भत्ता बाँड्नका लागि विभिन्न बैँकहरुमा रहेका लाभग्राहीका खातामा पठाइएको सामाजिक सुरक्षा शाखाका फोकल पर्सन दीपक अधिकारीले बताउनुभयो ।

उहाँका अनुसार १ नं वडाका लागि कामना सेवा विकास बैँक, २ नं का लागि प्रभू बैँक, ३ नंका लागि सांग्रिला विकास बैँक, ४ नंका लागि सिटिजन्स बैँक, ५ नंका लागि सांग्रिला विकास बैँक, ६ नंका लागि प्रभु बैँक, ७ नं का लागि मुक्तिनाथ विकास बैँक, ८ नं का लागि सिटिजन्स बैँक र ९ नं का लागि एनआइसी एसिया बैँकमा लाभग्राहीहरुका खाता सञ्चालित छ ।

लोकप्रिय

Related Articles