Monday, May 20, 2024

संकट टार्न मनहरी बहुमुखी क्याम्पसलाई गाउँपालिकाले १५ लाख दिने

ताजा / भरखरै प्राप्त

मनहरी–पुस १८ गते । तलब खुवाउन नसकेर केही महिना अध्यापन नै बन्द भएको पश्चिम मकवानपुरको एकमात्र मनहरी बहुमुखी क्याम्पसलाई मनहरी गाउँपालिकाले आर्थिक सहायता दिने भएको छ ।

तलब भत्ता ब्यवस्थापनका लागि पालिकाले १५ लाख रुपियाँ दिने निर्णय गरेको हो ।
पुस १२ गते बसेको कार्यपालिका बैठकबाट जनतासँग अध्यक्ष विकास कार्यक्रमबाट ७ लाख ५० हजार र जनतासँग उपाध्यक्ष विकास कार्यक्रमबाट ७ लाख ५० हजार गरी हाललाई १५ लाख रुपियाँ उपलब्ध गराउने गरी व्यवस्था मिलाइएको गाउँपालिका अध्यक्ष रन्जन कालाखेतीले बताउनुभयो ।

स्थापनाकालदेखिकै तलब प्राध्यापकहरुलाई दिन बाँकी रहेकाले आन्दोलन स्वरुप अध्यापन नै बन्द भएको थियो । केही दिनअघि सरोकारवाला बैठकले तत्कालै पठन पाठनको वातावरण बन्नका लागि सञ्चालक समितिलाई दबाब दिएसँगै पालिकाले यस्तो निर्णय गरेको हो ।

क्याम्पसले दिएको जानकारी अनुसार अहिले तलब भत्ता तथा अन्य खर्चहरु समेत गरी २० लाख रुपियाँको आवश्यकता छ । २० लाख रुपियाँ व्यवस्थापन गर्न सके तत्कालै क्याम्पसलाई नयाँ ढंगले शून्य तहबाट पुनर्जीवित गर्न सकिने अबस्था छ ।

तर, सञ्चालक समितिले गाउँपालिकाको मुख ताकेर अन्य स्रोतको पहिचान नगर्दा क्याम्पस ऋणमा फस्दै बन्द हुने अबस्थामा पुगेको हो । यद्यपि, गाउँपालिकाले कक्षा १२ सम्मको व्यवस्थापनका लागि कानूनी अधिकार पाएको छ ।

क्याम्पस सञ्चालक समितिले यही पुस २३ गतेलाई क्याम्पस सभा बोलाएको छ । सभाले अध्यक्षसहित अन्य सञ्चालक सदस्यहरुको चयन गर्नेछ । स्रोतका अनुसार त्यतिखेर राजनीतिक दलको भागबण्डामा परेपछि क्याम्पसको बैठकमा सदस्यहरु अनुपस्थित हुने, क्याम्पसको समस्याबारे ध्यान नदिने गर्नेगरेका छन् ।

यद्यपि, क्याम्पस प्रमुख अमित पौडेल आफै क्याम्पसबाट बहिर्गमनको बाटो खोजिरहनु भएको छ । मनहरीका अगुवा र अग्रज भन्नेहरुले पालिका प्रमुखलाई अध्यक्ष बनाएर आर्थिक भारी बोकाउने र उम्कने गर्नेगरेका छन् । सोही बमोजिम तत्कालीन गाउँपालिका अध्यक्ष उप्रेतीमाथि व्यवस्थापकीय भारी बोकाइएको थियो ।

यसपटक पनि गाउँपालिका अध्यक्षरन्जन कालाखेतीलाई सोही भारी बोकाउने प्रयत्न हुने भएपनि अध्यक्षले उक्त प्रस्तावलाई अस्वीकार गरिसक्नु भएको छ ।

लोकप्रिय

Related Articles