मनहरी–पुस १८ गते । बालमैत्री स्थानीय शासन अवलम्बन भएको नेपालकै पहिलो गाउँपालिका घोषित मनहरीमा एक बर्षपछि बालमैत्री सहजकर्ताको व्यवस्थापन गर्न लागिएको छ ।
एक बर्षअघि मनहरी गाउँपालिकामा कार्यरत बालमैत्री सहजकर्ताहरु हटाइएको थियो ।
तत्कालीन अध्यक्ष एकराज उप्रेतीको नेतृत्वमा बसेको कार्यपालिका बैठकले ज्यालादारी काममा लागिरहेका ९ वटै वडाका बालमैत्री सहजकर्ताहरु हटाएर रिक्त बनाएको थियो ।
त्यसयता पालिकाभित्र बालबालिकाको गतिविधिहरु राम्ररी सञ्चालन हुन नसकिरहँदा पुनः २ जना सहजकर्तालाई भर्ना लागिएको हो । मनहरी गाउँपालिकाले कार्यपालिका बैठकबाट बालमैत्री सहजकर्ता भर्नाका लागि निर्णय गरेको हो । तर, यसपटक बालमैत्री सहजकर्ता वडापिच्छे नराखी साबिक हाँडीखोला र मनहरी गाविस हेर्नेगरी राख्न लागिएको हो ।
पुस १२ गते बसेको कार्यपालिका बैठकले ज्यालादारीमा काम गर्नेगरी बालमैत्री सहजकर्ता भर्ना गर्ने प्रक्रिया अघि बढाउनका लागि निर्णय गरेको मनहरी गाउँपालिकाले जनाएको छ ।
यसअघि तत्कालीन नेतृत्वले आर्थिक अबस्था कमजोर रहेको भन्दै ज्यालादारीमा काम गरिरहेका १० जना बालमैत्री सहजकर्ता एकसाथ हटाएको थियो । हटाइएकाहरुमध्ये ४ जना सहजकर्ता गर्भवती र सुत्केरी अबस्थाका थिए ।
गर्भवती र सुत्केरी अबस्थामा रहेका सहजकर्ताहरुलाई समेत हटाउने निर्णय गरेपछि मनहरी बाल सञ्जाल आन्दोलित भएको थियो । बालबालिकाको आन्दोलनका क्रममा राजनीतिक दलका नेताहरुलाई भेटेर निर्णय सच्याउन र बर्खास्त गरिएका सहजकर्ताहरुको पुनर्वहाली गर्न भनिएपनि दलका पालिकास्तरीय नेताहरुले बालबालिकाको आँखामा छारो हालेर उम्केका थिए ।
यद्यपि त्यतिखेर आर्थिक अभावका कारण देखाउँदै सहजकर्ता हटाउने निर्णय गरेको कार्यपालिकाको सोही बैठकले १० लाख रुपियाँ खाजा÷खानामा खर्च गर्ने निर्णय गरेको थियो ।
