हेटौडाँ–पुष ६ गते । चेपाङ समुदायकै पहिलो गायक रबिन कुमार चेपाङ पुरस्कृत हुनुहुने भएको छ ।
विजय बानियाँ स्मृति लोक संगीत पुरस्कारबाट गायक रविन्द्रकुमार चेपाङलाई पुरस्कृत गरिने भएको हो । चेपाङलाई २० हजार रुपैयाँ राशीसहित पुरस्कृत गरिने भएको हो ।
भीम विराग संगीत, साहित्य, कला प्रतिष्ठानले विभिन्न क्षेत्रका ६ जना व्यक्तित्वलाई पुरस्कृत गर्ने कार्यक्रम स्वरुप गायक चेपाङलाई विजय बानियाँ स्मृति लोक संगीत पुरस्कारबाट पुरस्कृत गर्न लागिएको हो ।
बुधबार हेटौंडामा पत्रकार सम्मेलन गरेर पुरस्कृत हुने व्यक्तिको सार्वजनिक सूचिमा चेपाङ पनि पर्नुभएको हो । आगामी शनिबार एक समारोहकाबीच पुरस्कृत गरिने प्रतिष्ठानका महासचिव केशवलाल श्रेष्ठले जानकारी दिनुभयो ।
त्यस्तै प्रतिष्ठानले तुलसीमाया शिवकुमारी सिर्जनशील नारी पुरस्कारबाट साहित्यकार भावना सापकोटालाई पुरस्कृत गर्ने भएको छ । आँचल साहित्य कला पुञ्जकी अध्यक्ष समेत रहनुभएकी सापकोटालाई १० हजार रुपैयाँ राशिसहित पुरस्कृत गरिने बताइएको छ ।
भीम–मथुरा बाल प्रतिभा पुरस्कारबाट हेटौंडा–२ स्थित बालजागृति इंग्लिस सेकेण्डरी स्कूलकी छात्रा सुविज्ञा सुवेदीलाई पुरस्कृत गरिने भएको छ ।
बालसाहित्यमा सक्रिय सुवेदीलाई ७ हजार ५ सय रुपैयाँ राशीसहित पुरस्कृत गरिन लागेको हो । यस्तै चिनुकुमारी लामा स्मृति साहित्य पुरस्कारबाट काठमाडौंका साहित्यकार बासुदेव गुरागाईँलाई पुरस्कृत गरिने भएको छ ।
गुरागाईँलाई १५ हजार रुपैयाँ राशीसहित पुरस्कृत गरिने बताइएको छ । यसैगरी मंगलादेवी स्मृति स्वास्थ्य सेवा पुरस्कारबाट स्वास्थ्यकर्मी बेला वैद्यलाई पुरस्कृत गरिने बताउनुभयो ।
उहाँलाई १० हजार रुपैयाँ राशीसहित पुरस्कृत गरिन लागेको प्रतिष्ठानका महासचिव श्रेष्ठले बताउनुभयो ।
