Wednesday, May 22, 2024

वन जोगाउनु सबै उपभोक्ताको दायित्वः उपाध्यक्ष पुलामी

ताजा / भरखरै प्राप्त

मनहरी–भदौ २९ गते । वन जंगल जोगाउन वन समूहका पदाधिकारीहरुको मात्रै जिम्मेवारी नभएर समग्र उपभोक्ताहरु नै जागरुक हुनुपर्नेमा मनहरी गाउँपालिका उपाध्यक्ष सीता पुलामी मगरले जोड दिनु भएको छ ।

मनहरी गाउँपालिका ७ स्थित मनकामना सामुदायिक वन उपभोक्ता समूहको १८ औ बार्षिक साधारण सभामा बोल्दै उहाँले आफू पनि १२ बर्ष वन समूहको पदाधिकारी भएर काम गर्दा उपभोक्ताहरुको जागरण नआएको अनुभव समेत सुनाउनु भयो ।

‘जंगल जोगाउनु हामी सबैको कर्तब्य हो’, उहाँले भन्नुभयो–‘उपभोक्ताहरुले नै आफ्नो कर्तब्य पूरा गर्नुपर्छ ।’
साधारण सभामा बोल्दै डिभिजन वन कार्यालय राप्ती मनहरीका प्रमुख बिष्णुप्रसाद आचार्यले सामुदायिक वन उपभोक्ता समूहहरुले सालमा मात्र आँखा लगाउन नहुने बताउनुभयो ।

उहाँले मनकामना सामुदायिक वन उपभोक्ता समूहको २ हेक्टर क्षेत्रमा नीमको बिरुवा रोपिएको प्रसंग सुनाउँदै छतिवन, चिउरी, दार लगायतका लोप हुँदै गएका बिरुवाहरु रोप्नुपर्नेमा जोड दिनुभयो ।

कार्यक्रममा ७ नं वडाका कार्यबाहक वडाध्यक्ष नवराज सुवेदी, मकवानपुर उद्योग बाणिज्य संघ पश्चिम क्षेत्र समितिका सभापति गणेशमान मानन्धर, राजनीतिक दलहरुका तर्फबाट उमेश मुक्तान, सञ्चारकर्मी शिवकुमार काशी, साङ्ग छोयफेल गुम्बाका अध्यक्ष गौतम लामा लगायतले शुभकामना मन्तब्य ब्यक्त गर्नु भएको थियो ।

सभामा कोषाध्यक्ष बुद्धिमाया तामाङ (मनिसा) ले आर्थिक बर्ष २०७९/८० मा भएको ३२ लाख १२ हजार ५ सय ८८ रुपियाँ बराबरको खर्च र आम्दानी बिवरण प्रस्तुत गर्नु भएको थियो ।

समूहका अध्यक्ष सुरेश कुमार मुक्तानको अध्यक्षतामा भएको सभाले नयाँ भवन निर्माण गर्ने, वन पैदावार बृद्धि र उत्पादन बृद्धि गर्ने, बुद्धशान्ति हरित पार्कलाई व्यवस्थित गर्ने लगायतका प्रस्तावहरु पारित गरेको छ ।

लोकप्रिय

Related Articles