मनहरी–जेठ २ गते । नेपाल रेडक्रस सोसाइटी मनहरी उपशाखाको पहिलो बैठक भएको छ ।
सभापति मोहन कार्कीको सभाध्यक्षतामा भएको बैठकले मनहरी उपशाखालाई राहत, उद्धार र पश्चिम क्षेत्रका उपशाखाहरुलाई समन्वय गर्ने निकायको रुपमा विकास गर्न पहल गर्ने निर्णय गरेको हो ।
यसअघि पनि मनहरी उपशाखाले पश्चिम क्षेत्रका उपशाखाहरुबीच समन्वयकारी भूमिका खेलेको स्मरण गर्दै सभापति कार्कीले पश्चिम क्षेत्रका बासिन्दा राहत तथा उद्धारको समस्या लिएर हेटौँडा शाखा जान नपरोस् भनेर मनहरीमै समन्वय केन्द्र स्थापना गर्नुपर्ने बताउनुभयो ।
बैठकले तत्कालै विपद समन्वय गोष्ठी स्थापना गर्ने, विद्यालय स्तरका जुनियर रेडक्रस सर्कल, युवा रेडक्रस सर्कलहरु गठन र पुनर्गठन गर्ने, बार्षिक कार्ययोजना तयार गरी तालिका बमोजिम काम गर्ने लगायतका निर्णयहरु गरेका छन् ।
बार्षिक योजना निर्माणका लागि उपसभापति अन्जु कार्कीको संयोजकत्वमा सचिव पुष्कर सुवेदी, कोषाध्यक्ष शिवकुमार रिजाल काशी, कमला मैनाली र राजन मैनालीसहितको टोली निर्माण गर्ने निर्णय गरेको छ ।
त्यसैगरी कार्यालयलाई व्यवस्थित गर्ने निर्णय गर्दै कार्यालय सचिवले राजीनामा दिएकोबारे समेत जानकारी गराइएको थियो ।
केही दिनअघि मात्रै रेडक्रस मनहरी उपशाखाको अधिवेसन सम्पन्न भई कार्कीको नेतृत्वको ११ सदस्यीय कार्यसमिति गठन गरिएको थियो ।
