मनहरी–बैशाख २७ गते । मनहरी खानेपानी तथा सरसफाई उपभोक्ता समितिको अध्यक्षमा पुनः भुवनकुमार जोशी निर्विरोध निर्वाचित हुनु भएको छ ।
उहाँसहित बिधान बमोजिम ११ सदस्यीय कार्य समितिको निर्विरोध चयन भएको हो ।
उपाध्यक्षमा बौतम लामा, सचिवमा हिमशिखर ब्लोन, सहसचिवमा सुजन पाठक र कोषाध्यक्षमा दिलबहादुर स्याङ्बो चयन हुनु भएको छ । त्यसैगरी सदस्यहरुमा रेनु पुडासैनी, मनु तामाङ, जुनेली मुक्तान, सफी अहमद, गीता कर्माचार्य र अनिल पौडेल चयन हुनु भएको छ ।
नयाँ नेतृत्व चयन भएसँगै मनहरी खानेपानी तथा सरसफाई उपभोक्ता समिति मनहरी गाउँपालिका वडा नं ७ भित्रमात्रै केन्द्रित भएको छ । यसअघि वडा नं ७, ८ र ९ का संयुक्त समितिको रुपमा यो संस्था क्रियाशील थियो ।
समितिको पहिलो साधारण सभा तथा अधिबेसनले उहाँहरुलाई निर्विरोध चयन गरेको निर्वाचन समितिका संयोजक पदमबहादुर तितुङले जानकारी दिनुभयो ।
साधारण सभामा मन्तब्य ब्यक्त गर्दै मनहरी गाउँपालिका अध्यक्ष रन्जन कालाखेतीले ठेक्का प्रक्रियामार्फत मनहरी बजार क्षेत्रमा फोहर संकलन गर्ने बताउनुभयो ।
उहाँले लामो समयपछि साधारण सभा आयोजना भएकोमा धन्यवाद दिँदै बिधान बमोजिम नियमित साधारण सभा आयोजना गर्न आग्रह गर्नुभयो ।
कार्यक्रममा मकवानपुर उद्योग बाणिज्य संघ पश्चिम क्षेत्र समिति सभापति नारायण सुवेदी, नेपाली काँग्रेसका उमेश मुक्तान, मनकामना सामुदायिक वन उपभोक्ता समूहका अध्यक्ष सुरेश मुक्तान, सामुदायिक रेडियो मनहरीका स्टेशन म्यानेजर शिवकुमार काशी, वडा सदस्य नवराज सुवेदी, ७ नं वडाध्यक्ष ठाकुरराम तितुङ लगायतले शुभकामना मन्तब्य व्यक्त गर्नु भएको थियो ।
त्यसैगरी साधारण सभामा अध्यक्ष भुवनकुमार जोशीबाट प्रगति प्रतिवेदन र कोषाध्यक्ष कमला मैनालीबाट आर्थिक प्रतिवेदन प्रस्तुत भएको थियो । साधारण सभामा संस्थापक अध्यक्ष प्रल्हाद लम्साल, सचिव पुष्कर सुवेदी, कोषाध्यक्ष कमला मैनालीसहित सदस्यहरुलाई सम्मान पनि गरिएको थियो ।
चार बर्षे अबधिको साधारण सभामा बिधान संशोधन प्रस्ताव समेत पारित भएको छ । संशोधित बिधानमा कार्य समितिमा एक महिला पदाधिकारी अनिबार्य कायम गर्ने र ४ जना महिला सदस्य रहने व्यवस्था छ ।
त्यसैगरी अन्य विभिन्न १२ वटा बुँदाहरुमा संशोधन गरिएको छ । संशोधित विधान सम्बन्धित निकायबाट स्वीकृति प्राप्त भएपछि लागू हुनेछ ।
विधान संशोधनका लागि सचिव पुस्कर सुवेदीको अध्यक्षतामा नारायण सुवेदी, पदमबहादुर तितुङ, गौतम लामा, शिवकुमार रिजाल, गोविन्द गलान सम्मिलित समिति गठन भएको थियो ।
