मनहरी–बैशाख १६ गते । राक्सिराङ गाउँपालिकाले आफ्ना पालिकाभित्रबाट एसईई दिएका विद्यार्थीहरुका लागि निःशुल्क कम्प्युटर तालिम दिलाएको छ ।
मनहरी ७ स्थित एकेडेमिक अर्थ इन्स्टिच्यूटसँग समन्वय गरी आधारभूत कम्प्युटर तालिम सुरु गरिएको हो ।
तालिमको शनिबार दिउँसो उद्घाटन गर्दै गाउँपालिका अध्यक्ष मल्लले गाउँको विकासका लागि नयाँ पुस्ताको अग्रसरता आवश्यक रहेको बताउनुभयो ।
‘अहिलेका नयाँ पुस्ताका भाई बहिनीहरुले राक्सिराङ गाउँपालिकाको भूगोल, परिस्थिति, अफ्ठ्याराहरु बुझेर मसिनो गरी आफ्नो मातृभूमिको विकासका लागि लाग्नुपर्ने आवश्यकता आएको छ ।’
उहाँले भन्नुभयो । आफूले खैराङको बागेश्वरी विद्यालयमा बेन्च अभावमा ढुंगामाथि स्याउला ओछ्याएर विद्यालय शिक्षा लिएको प्रसंग कोट्याउँदै अहिलेका बालबालिकालाई स्थानीय र संघीय सरकारले निकै सुविधा दिलाएको प्रष्ट्याउनुभयो ।
अहिलेका युवालाई कम्प्युटर शिक्षा अनिबार्य रहेको भन्दै गाउँको विकास, समृद्धि र रुपान्तरणजस्ता कार्यहरु फेसबुक र युट्युबमा देखाएर मात्रै सम्भव नहुने अध्यक्ष मल्लको भनाई थियो । ‘केही मान्छेहरु फेसबुक र युट्युबतिर कराइरहेको देख्छौँ, त्यसले विकास सम्भव होला र ?’ उहाँको भनाई थियो ।
उहाँले विकास, समृद्धि र सामाजिक रुपान्तरणका लागि नयाँ पुस्ता र पुराना पुस्ताबीचको समन्वयकारी भूमिका जरुरी रहेको बताउनुभयो ।
राक्सिराङ गाउँपालिकाबाट पढेर र संघर्ष गरेर आएका मानिसहरु मनहरी र हेटौँडासहित राष्ट्रियस्तरमा स्थापित भएकाले सोही बाटोमा जान उहाँले तालिममा सहभागीहरुलाई अनुरोध गर्नुभयो ।
कार्यक्रममा उपाध्यक्ष बनस्तम थिङले राक्सिराङबाट मनहरीतिर झरेका मानिसहरुले समग्र सामाजिक र राजनीतिक नेतृत्व गरिरहेको सम्झना गर्दै नयाँ पुस्ताले नयाँ सीप र दक्षता अभिबृद्धि गरी कुनै पनि भूगोलमा स्थापित हुनुपर्नेमा जोड दिनुभयो ।
‘अहिले सिक्न उमेर हो’, उपाध्यक्ष थिङको भनाई थियो–‘सिक्ने क्रममा कुनै पनि हिसावको अफ्ठ्यारो आइपरेमा स्थानीय सरकारलाई सम्झनू ।’
एकेडेमिक अर्थ इन्स्टिच्यूटका सञ्चालक नरहरि कार्कीको अध्यक्षतामा भएको कार्यक्रममा अर्का सञ्चालक मनोज मुक्तानले स्वागत मन्तब्य ब्यक्त गर्नु भएको थियो भने राष्ट्रिय रोटरी माविका प्रधानाध्यापक गोविन्दप्रसाद पौडेल, रेडियो मनहरी एफएमका म्यानेजर शिवकुमार काशी लगायतले शुभकामना मन्तब्य ब्यक्त गर्नु भएको थियो ।
उद्घाटन कार्यक्रम सञ्चालन गर्दै इन्स्टिच्यूटका सञ्चालक गोविन्द थिङले यो सिजनमा मात्रै इन्स्टिच्यूटमा १ सय जनाले कम्प्युटर सिकिरहेको जानकारी दिनुभयो ।
