मनहरी–फागुन ११ गते । मनहरी ७ मा रहेको पशुपति सामुदायिक वन उपभोक्ता समूहको अध्यक्षमा चौथोपटक रघुनाथ रुम्बा चयन हुनु भएको छ । स्थापना कालदेखि नै उहाँ अध्यक्षको रुपमा कार्यरत हुनुहुन्छ ।
बिहिबार भएको १७ औँ बार्षिक साधारण सभाले पुनः रुम्बालाई नै अध्यक्ष पदमा निर्विरोध चयन गरेको हो । समितिको उपाध्यक्ष चयन हुन बाँकी छ । सचिवमा ठाकुरराम तितुङ, कोषाध्यक्षमा शान्तामाया राई र सहसचिवमा आमोश प्रजा चयन हुनु भएको
छ ।
त्यसैगरी सदस्यहरुमा गीता स्याङ्तान, ठूलीमाया थिङ, कमला स्याङ्तान, सन्तमाया परियार, मैतसिंह तामाङ र रिसिमाया बल चयन हुनु भएको छ । नव गठित समितिको शुक्रबार बस्ने बैठकले उपाध्यक्षसहित लेखा समिति र सल्लाहकार समितिको चयन हुने समूहले जनाएको छ ।
आफ्नै नेतृत्वमा स्थापना भएको संस्थामा आम उपभोक्ताले नेतृत्व छोड्न नदिएको र अझै वन विकासका कामहरु परिवर्तित सन्दर्भमा थप गर्नुपर्ने आवश्यकता रहेकाले पुनः अध्यक्षमा आफू चयन भएको रुम्बाले बताउनुभयो । ‘मैले लामो समय नेतृत्व गरेँ, अब छाड्छु भनेर भेलामा भनेको हुँ’, रुम्बाले भन्नुभयो–‘साथीभाई र आम उपभोक्ताहरुले नेतृत्व छाड्न दिनु भएन ।’ साधारण सभामा आर्थिक तथा प्रतिवेदन पारित गरिएको छ ।
भेलामा डिभिजन वन कार्यालय राप्ती मनहरीका सहायक वन अधिकृत शम्भु तामाङ, मनहरी सेक्टर कार्यालयका प्रमुख राकेश चन्द्रबंशी, ७ नं वडाका कार्यबाहक वडाध्यक्ष नवराज सुवेदी, तामाङ एकता समाजका अध्यक्ष इन्द्रकुमार भोलन, रमन्टार डिपाड बचत तथा ऋण सहकारी संस्थाका अध्यक्ष उमेश मुक्तान, मनकामना सामुदायिक वन उपभोक्ता समूहका इन्द्रकुमारी मुक्तान, राष्ट्रिय माध्यमिक विद्यालयका प्रधानाध्यापक चन्द्रकान्त रिमाल, सामुदायिक वन उपभोक्ता महासंघ मनहरीका अध्यक्ष हेमलाल उप्रेती लगायतले शुभकामना मन्तब्य ब्यक्त गर्नु भएको थियो ।
