राक्सिराङ–माघ १९ गते । स्थानीय तहमा मानव अधिकार समूहको समस्या पहिचान तथा कार्ययोजना बैठक सम्पन्न भएको छ ।
राक्सिराङ गाउँपालिकाको सभा हलमा भएको बैठकले राक्सिराङ गाउँपालिका स्तरीय मानव अधिकार समूहको संयोजक चन्द्रमान प्रजाको सभाध्यक्षतामा सम्पन्न बैठकमा गाउँपालिकाको शिक्षा, स्वास्थ्य र वातावरणसंग सम्बन्धी समस्या पहिचान तथा आगामी दिनमा सम्बन्धित क्षेत्रलाई झकझक्याउने र जवाफदेही बनाउने निर्णय गरेको छ ।
कार्यक्रममा राक्सिराङ गाउँपालिकाका विभिन्न वडामा विद्यालयमा पानीको अभावको कारण विद्यार्थीले शौच बस्न नपाएको, शिक्षक समयमा नपुग्ने, स्वास्थ्य संस्थामा प्राथमिक उपचारका सामाग्री समेत नभएको बिषयहरु उठान भएको थियो ।
सहभागीहरुले गर्भवतीहरुलाई भिडियो एक्सरे सेवा नभएको गुनासो गर्दै पालिकामै सेवा लिन पाए राम्रो हुन्थ्यो भन्दै गुनासो गरेका थिए ।
जवाफमा ५ नम्बर वडाका वडा अध्यक्ष हरि प्रजाले पालिकाले भिडियो एक्सरे मेसिन भित्र्याउन पालिकाको कार्यपालिकाको बैठकले निर्णय गरिसकेको र छिट्टै भिडियो एक्सरे मेसिन पालिकामै उपलब्ध हुने भन्दै प्रतिबद्धता समेत जनाउनुभयो ।
साथै मानव अधिकार समूहसङ्गै मिलेर अगाडि बढ्ने र निरन्तर खबरदारितामा लागिरहन समेत अध्यक्ष प्रजाले आग्रह गर्नुभयो । कार्यक्रमको आवश्यकता, औचित्य र राक्सिराङमा मानव अधिकारको बिषय प्रवेशका सम्बन्धमा मानव अधिकार समूह मनहरीका सल्लाहकार एबम् पत्रकार शिवकुमार काशीले धारणा राख्नु भएको थियो ।
उहाँले राक्सिराङका भौतिक विकास मात्र सम्पूर्णता नभई मानव अधिकारको रक्षा र आधारभूत आवश्यकताहरुको परिपूर्तिका निम्ति राज्यको दह्रो उपस्थिति बढाउन दबाबमुलक भूमिका आवश्यक रहेको बताउनु भएको थियो ।
कार्यक्रमको सहजीकरण अनौपचारिक क्षेत्र सेवा केन्द्र इन्सेककी सहजकर्ता सलीना गौतम र मानव अधिकार समूह मनहरीका सदस्य उमेश राईले गर्नु भएको थियो ।
