मनहरी–माघ १८ गते । मनहरी गाउँपालिकाले गाउँपालिका अन्र्तगतका मावि विद्यालयका विज्ञान शिक्षकहरुलाई पाँच दिने पेशागत क्षमता विकास तालिम शुरु भएको छ ।
माघ १८ गते बुधबारबाट सुरु भएको तालिम माघ २२ गते समाप्त हुने जनाएको छ ।
नेपाल सरकार शिक्षा मन्त्रालयले पछिल्लो समय पाठ्यक्रम परिवर्तन गरेसंगै नयाँ पाठ्याक्रम अनुसार कसरी शिक्षण गर्ने, प्रश्न पत्र कसरी निर्माण गर्ने भन्ने विषयमा तालिम प्रदान गरिने मनहरी गाउँपालिका शिक्षा शाखाका स्रोत व्यक्ति पूर्ण भद्र भुसालले बताउनुभयो ।
कतिपय शिक्षकहरुको हातमा पाठ्यक्रम पनि नहुने भएकाले पाठ्यक्रमले गरेको व्यवस्थाको बारेमा पहिलो र दोस्रो दिन तालिम प्रदान गरिने उहाँले बताउनुभयो ।
विज्ञान विषय प्रयोगात्मक विषय भएको तर कतिपय शिक्षकहरुले अझै पनि प्रयोगात्मक कक्षा सञ्चालन नगरेको भन्दै यसरी कसरी व्यवस्थापन गर्ने, प्रयोगात्मक कक्षाको महत्वको विषयमा प्रयोगशालामा लगेरै तालिम प्रदान गरिने छ ।
तालिम प्राप्त गरिसकेपछि पाठयक्रमको आधारमा शिक्षण गर्ने, प्रश्न पत्र निर्माण गर्ने, विज्ञान प्रयोगशालमा विद्यार्थीहरु समक्ष कसरी प्रस्तुत हुने र कसरी सिकाउने भन्ने विषयमा जानकार हुने लक्ष राखिएको उहाँले बताउनुभयो ।
मनहरी गाउँपालिका अन्तर्गत रहेका १८ वटा सामुदायिक विद्यालय र तीन वटा निजि विद्यालयका शिक्षकहरु उपस्थित रहेको उहाँले बताउनुभयो ।
