मनहरी–पुस २ गते । मनहरी गाउँपालिका अध्यक्ष रन्जन कालाखेतीको एक्सनपछि राजश्व छली गर्दै ‘सेटिङ’ मा पल्केका टिपर तथा ट्रयाक्टर चालकहरुले राजश्व रसिद काट्ने रफ्तारलाई बढाएका छन् ।
मंसीर २२ गते साँझ अध्यक्ष कालाखेतीको एक्सनबाट ३ वटा टिपरमाथि कारबाही भएको थियो ।
उक्त घटना लगत्तै राजश्व तिरेर मनहरीबाट नदिजन्य बस्तु ढुवानी गर्ने सवारी साधनको संख्यामा बृद्धि भएको पाइएको छ । मंसीर २३ गतेका दिन २०० वटा ढुवानी साधनबाट ८ लाख १५ हजार २ सय रुपियाँ संकलन भएको छ ।
त्यसैगरी मंसीर २४ गते यो ढुवानी साधनको संख्या बढेर २१९ वटा पुग्दा ८ लाख ६० हजार, मंसीर २५ गते २१२ वटा ढुवानी साधनले राजश्व तिर्दा ८ लाख ६२ हजार ६ सय, मंसीर २६ गते २२१ वटा ढुवानी साधनले राजश्व तिरेर चितवन निकासी गर्दा ८ लाख ६२ हजार ३ सय रुपियाँ राजश्व संकलन भएको पाइएको छ ।
त्यसैगरी मंसीर २७ गते पुनः ढुवानी साधनको संख्या घटेर १९१ मा पुग्दा ८ लाख ६२ हजार ६ सय रुपियाँ संकलन भएको थियो ।
मंसीर २८ गते २०८ वटा ढुवानी साधनले नदीजन्य बस्तु निकासी गर्दा लाख ६२ हजार २ सय र मंसीर २९ गते १९४ वटा ढुवानी साधनबाट नदीजन्य बस्तु चितवन निकासी हुँदा ८ लाख ६२ हजार ६ सय रुपियाँ राजश्व संकलन भएको मनहरी गाउँपालिकाले जनाएको छ ।
अध्यक्षको एक्सनपछि कर्मचारीहरुलाई निलम्बन गर्ने, टिपर चालकलाई जरिबाना तिराउने लगायत दण्ड गरिएको छ । त्यससँगै प्रहरी चौकी लोथरका इन्चार्जको समेत सरुवा भएको पाइएको छ ।
‘राजश्व छली रोक्न विभिन्न ढंगले प्रयत्न गरिरहेका छौँ’, अध्यक्ष कालाखेतीले भन्नुभयो–‘नागरिक समाजले पनि हाम्रो अभियानलाई साथ देओस् भन्ने चाहना हामीले गरेका छौँ ।’ राजश्व छलीमा संलग्न जोकोहीलाई कारबाहीका दायरामा ल्याउने उहाँले बताउनुभयो ।
