मनहरी–भदौ २ गते । मनहरी गाउँपालिकाभित्र दर्ता भएको ४३ वटा सहकारीमध्ये १८ वटा मात्रै सक्रिय रहेको पाइएको छ । कूल दर्ता कायम भएकामध्ये ५ वटा सहकारी खारेज भएपछि अहिले सहकारीको संख्या ४३ मात्रै छ । तीमध्ये १८ वटा नियमित रहेको गाउँपालिकाले जनाएको छ ।

सहकारीको दर्ता तथा नियमनका अधिकार स्थानीय तहलाई आएसँगै डिभिजन सहकारी कार्यालय मकवानपुरबाट हस्तान्तरण भई आएका अधिकाँश सहकारीहरु निष्क्रिय रहेको पाइएको हो । गाउँपालिकाका सामाजिक विकास अधिकृत शैलेस बास्कोटाका अनुसार अहिले १८ वटा मात्रै सहकारी सक्रिय देखिएका छन् ।

सहकारी विभागले कोपोमिस सफ्टवेयर निर्माण गरी देशभरका सहकारीको नियमित कारोबार र अन्य प्रशासनिक गतिविधिहरु अध्यावधिक राख्ने गरेको छ ।

तर, गाउँपालिकाभित्रका १८ वटा सहकारीले मात्रै नियमित गतिविधिहरु अपलोड गर्नेगरेको उहाँले बताउनुभयो । कतिपय सहकारीहरु त अहिलेसम्म समुदायमै फेला नपरेको समेत उहाँले बताउनुभयो ।

गाउँपालिकाका अनुसार मनहरी गाउँपालिकाको हाँडीखोला र मनहरीतर्फ गरी २० वटा कृषि सहकारीहरु छन् । त्यसैगरी बचत तथा ऋण कारोबार गर्ने सहकारीको संख्या १३ रहेको छ । अन्य केही सहकारीहरु बहुद्देश्यीय र केही दुग्ध सहकारी र उपभोक्ता सहकारीहरु रहेका छन् ।

खारेज गरिएका सहकारीहरुमा दोभान मध्यवर्ती वचत तथा ऋण सहकारी मनहरी २, दिलज्योति बचत तथा ऋण सहकारी संस्था मनहरी ९, जनकल्याण दुग्ध उत्पादक सहकारी संस्था मनहरी ५, उन्नत अदुवा उत्पादन सहकारी संस्था मनहरी १ र सुनाचुरी मध्यवर्ती बचत तथा ऋण सहकारी संस्था मनहरी ६ रहेका छन् ।

निष्क्रिय रहेका केही सहकारी संस्थाहरु अझै खारेजी प्रक्रियामा लैजानुपर्ने, केहीलाई पुन सक्रिय बनाएर मर्ज गर्नुपर्ने अबस्था रहेको गाउँपालिकाले जनाएको छ । गाउँपालिकाले छिट्टै सहकारी सञ्जाल गठन गरी यसबारे निर्णय गर्ने तयारी गरेको बताइएको छ ।

LEAVE A REPLY

Please enter your comment!
Please enter your name here