राक्सिराङको कार्यपालिकालाई ‘चिउरी, चमेरो र चेपाङ’ बारे ब्रिफिङ

राक्सिराङ–भदौ २९ गते । राक्सिराङ गाउँपालिकाको कार्यपालिका टिमलाई चिउरी, चमेरो र चेपाङ समुदायको अन्तरसम्बन्धबारे अनुशिक्षण गरिएको छ ।

डिभिजन वन कार्यालय राप्ती मनहरीका प्रमुख बिष्णुप्रसाद आचार्यले राक्सिराङ गाउँपालिकाको आर्थिक समृद्धिको प्रमुख आधार चिउरी बन्न सक्ने र चेपाङ समुदायको जीवनस्तर सुधार्न सकिने सम्भावनासहितको प्रस्तुति दिनु भएको हो ।

गाउँपालिका अध्यक्ष राजकुमार मल्ल, उपाध्यक्ष बनस्तम थिङ, प्रमुख प्रशासकीय अधिकृत देवचन्द्र गड्तौलासहित वडाध्यक्षहरु र कार्यपालिका सदस्यहरुमा चिउरीको पर्याप्तता, उपयोगिता र यसको व्यवसायिकरणको सम्भावनाबारे आचार्यले जानकराी गराउनु भएको हो ।

प्रस्तुतिमा कार्यालय प्रमुख आचार्यले चिउरी, चेपाङ र चमेरो एकापसमा अन्योन्याश्रित सम्बन्ध रहेको उल्लेख गर्दै राक्सिराङ गाउँपालिकाले चिउरीको संरक्षण गर्न सकेमा मौरीपालनको परिमाणात्मक बृद्धि हुनेमा समेत जोड दिनुभयो ।

‘हामी जनतालाई यसको महत्व बुझाउँदै हिँडेका छौँ, चिउरीका नर्सरी बनाएर बृक्षरोपण गराउँदै हिँडेका छौँ’, प्रमुख आचार्यले भन्नुभयो–‘हामी कर्मचारीहरु त सरुवा भएर जाने हो, तर तपाईहरु आफ्नो गाउँ ठाउँमा रहनुहुने जनप्रतिनिधिहरुले यो कुरालाई बुझेर अभियानमा जोडिनुप¥यो ।’

चिउरी, चमेरो र चेपाङको अभियानलाई आफूहरुले सकारात्मक रुपमा लिएर सिर्जनात्मक रुपमा सहयोग गर्ने गाउँपालिका अध्यक्ष राजकुमार मल्लले प्रतिबद्धता ब्यक्त गर्नुभयो ।

यस बर्ष चिउरी संरक्षणका लागि प्रदेश र संघीय सरकारले समेत बजेट बिनियोजन गरेको छ भने चिउरी, चेपाङ र चमेरो संरक्षणका लागि बागमती प्रदेश सरकारले नीति तथा कार्यक्रममा उल्लेख गरी बजेटको बिनियोजन गरेको छ ।

कार्यक्रममा सबै वडाका वडाध्यक्षहरु, सामुदायिक वन उपभोक्ता महासंघ राक्सिराङका अध्यक्ष थलबहादुर थापा (सन्तोष), सिद्धार्थ हरियाली सामुदायिक वन उपभोक्ता समूह राक्सिराङ ३ का अध्यक्ष एबम् सञ्चारकर्मी ज्ञानेन्द्र तामाङ लगायतको सहभागिता रहेको थियो ।

LEAVE A REPLY

Please enter your comment!
Please enter your name here